Ho̍at-tōng Soan-thôan

活動起因 ：
228大屠殺到taⁿ已經75冬–ah，其中也歷經幾擺ê政權轉換。Khiok整體屠殺事件仝款iá-bē完全tit-tio̍h平反kap進行轉型正義ê處理。Lán beh tī chia呼籲政府ài積極針對228大屠殺kap白色恐怖進行轉型正義，chhiūⁿ拆除孫文kap蔣介石獨裁者ê雕刻像。另外，lán mā建議228紀念活動應民俗化，hō͘紀念活動深根民間成做一種新ê文化傳統。按呢，才會當hō͘ 世世代代ê台灣人深深記tiâu228大屠殺ê歷史教訓。
紀念活動民俗化是留 hō͘後代囝孫永遠思念ê方法之一。比喻，逐擺講tio̍h五日節，足chē人攏會聯想tio̍h楚國ê愛國詩人屈原，koh以食肉粽、pe龍船來紀念伊。甚至中國重慶文藝界抗敵協會tī 1939年決議kā五日節訂作詩人節thang藉這个緣故來提升中國人民ê愛國意識。Tio̍h-sǹg學術界對屈原kap五日節ê因果關係有無仝ê見解，m̄-koh民間soah攏普遍存在五日節是源自紀念屈原ê古板想像。甚至koh有kā伊聯想做中國人ê愛國主義ê表徵。其實，nā chiū五日節故事ê本質來看，屈原當初是主張對抗秦國ê楚國人。Ā tō-sī講屈原是反對霸權、反對統一ê楚國民族主義者。用當代ê角度來看，屈原絕對反對「九二共識」、「一中各表」、「一中同表」ê霸權主張。Só͘-pái，是按怎民間koh繼續存在「屈原是中國的愛國詩人」按呢ê迷失想像？這凸顯民俗活動確實有伊ê影響力！
公元1947年3月初10，台北市律師公會會長李瑞漢kah厝內ê人、朋友tī厝tng leh食鰇魚糜。憲兵kap便衣–ê hiông-hiông chông入來非法逮捕李瑞漢，chŏaⁿ按呢一去無回。日後逐冬3月初10李瑞漢家屬tō以食鰇魚糜來紀念伊。除了李瑞漢以外，koh有足chē台灣菁英tī這場228大屠殺當中受難，chhiūⁿ湯德章、王育霖、林茂生、陳澄波等。為tio̍h beh紀念chia–ê為台灣犧牲ê英靈，阮特別辦理這擺ê新民俗活動，beh透過台語歌詩kap鰇魚糜、鰇魚絲來感謝chia–ê護國台灣先賢先烈。