Le̍k-sú

公元 2001 年 8 月 19 號社團法人台灣羅馬字協會（ē-kha簡稱台羅會）借用淡水真理大學ê場地辦理成立大會 1。台羅會ê成立ē-sái 講是宣告台灣ê羅馬字運動kiâⁿ chiūⁿ全民化、有意識、有組織ê文化脫漢ê釘根路線。

台羅會以 chhui-sak「白話字」（Pe̍h-ōe-jī）做官方文字為宗旨。白話字 mā 號做「教會羅馬字」、「台灣字」、「咱人字」，伊是 19 世紀後半期 ê sî-chūn 透過傳教士傳入台灣 ê 主要 teh 書寫台語 kap 客語 ê 羅馬字系統。白話字對 19 世紀尾20 世紀初台灣 ê 全民教育、文化啟蒙 kap 文學創作有真大 ê 影響 kap 貢獻(蔣為文 2013:75)。

Tī 漢字文化圈內底，有二个民族是 ǹg 羅馬字化 ê 脫漢方向進行。一个是已經成功 ê 越南，另外一个是 tng teh phah-piàⁿ ê 台灣。Tī 20 世紀初 chìn-chêng，台灣 kap 越南 ê 羅馬字運動進展差不多是 sio-siāng ê。像講，越南 tī 1865 年發行第一份 ê 羅馬字報紙《嘉定報》；台灣 tī 1885 年mā 發行第一份羅馬字報紙《台灣府城教會報》。M̄ -koh，到 kah 20 世紀初，台越雙方開始分輸贏，用無仝 ê 速度發展羅馬字。

越南人 tī 1907 年成立「東京義塾」，主要 ê 目的是 beh 啟發民智 kap chhui-sak 羅馬字。雖然東京義塾成立無 kah 1 冬就 hō͘ 法國殖民者強迫關門，m̄ -koh in ê 主張 soah tī 知識份子內底普遍得 tio̍ h 認同 kap 支持。Tī in ê 影響之下，「推廣羅馬字」soah 變成越南民族主義者 ê 普遍主張 kap 推動要點，mā 引起一陣興學、辦羅馬字報紙 ê 風潮(蔣為文 2011:301)。Chit-ê 風潮是後來胡志明 ē-tàng tī 1945 年宣布採用羅馬字做越南正式官方文字 ê 重要草根基礎。

台灣人 tī 1921 年 mā 成立 beh 啟發民智 ê「台灣文化協會」。可惜台灣文化協會 khah 無東京義塾 hiah-nih 看重羅馬字。Sui-bóng 1923 年蔡培火接台灣文化協會 ê 專務理事 liáu 有 khah 積極 chhui-sak 白話字，m̄ -koh 會內真正關心羅馬字運動 ê 人無 chē。因為蔡培火 ê 關係，台灣文化協會 chiâⁿ 做第一個公開正式提倡普及羅馬字 ê “非宗教目的” ê 文化團體（蔣為文 2009）。蔡培火雖然有心，無奈政治環境無允准。後來因為日本 hām 中國 ê 戰事 lú來 lú明顯，白話字 ê chhui-sak mā tī 1936 年暫告一段落。

1945 年 8 月 15 號日本投降了，聯軍指派蔣介石代表聯軍接收台灣 kap 越南北部。胡志明發動「八月革命」，趕 tī 蔣介石軍隊 iáu-bōe 全面進入越南 chìn 前就 sûi tī 1945 年 9 月初 2 宣布成立「越南民主共和國」(蔣為文 2011:261)。可惜， 台灣人 ê ba̍ k-chiu 去 hō͘ lâ-á 肉 kô͘--tio̍ h，“認賊做老爸”，kiò-sī 蔣介石是救星。結局蔣介石 “死豬 tìn tiam”，硬 kā 走路 ê 中華民國 ê 神主牌 chhāi tī 台灣，按算借体還魂。Tī 外來政權 ê 政治戒嚴 kap 獨尊中國語政策之下，白話字 kap 台灣各族群 ê 本土語文 soah 無生存 ê 空間。

到 kah 1987 年解嚴以後，台灣語文 ùi hit chām chiah 開始受 tio̍ h tháu-pàng。Lú 來 lú chē ê 個人 ia̍ h-sī 團體投入台灣語文 ê 研究、推廣 ia̍ h-sī 寫作。Chit 當中， 公開主張使用全羅馬字 koh 有正式登記 ê 社團就是台灣羅馬字協會。台羅會比日本時代 ê 台灣文化協會 koh khah 明確 kā 羅馬字 ê chhui-sak 列做社團要緊 ê khang-khòe，ǹg-bāng 透過羅馬字 chiâⁿ 做文化台灣 ê kun-té。Che 象徵台灣 ê 知識份子有 khah chē 人開始思考 kap 實踐文化脫漢 ê 議題 ah。Che 是真大 ê 進步！

台羅會 ùi 2001 年成立到 taⁿ，活動成果大概分做 4 大類：第一類是 ta̍ k 冬定期 ê 年會 kap 世界台語文化營。第 2 類是進行白話字 kap 台語文資料數位化&網路傳播 ê 基礎 khang-khòe。第 3 類是無定期 ê 研習、認證 kap 師資培訓課程。第4 類是政治遊說 kap 抗爭。因為篇幅限制，下面 tō kéng kúi 項重點紹介。

台羅會年會liōng-iok-á lóng tī寒假ê sî-chūn辦，主要是會員大會ê性質。世界台語文化營lóng tī hioh-lo̍a h ê sî-chūn辦。世界台語文化營ê源頭是 1995 年由台灣獨立建國聯盟美國本部蔡正隆主席tī美國Houston辦ê北美台語文夏令會。Hit pái ê 夏令會由胡民祥擔任大會祕書長。第 2 pái夏令會換去加州，第 3 屆 1997 年轉來tī台南南鯤鯓（由黃勁連擔任總幹事），第 4 & 5 屆koh tī美國Hawaii辦理 2。Ùi第 4 屆 1998 年開始營隊名稱定形做世界台語文化營。北美台文通訊社kap聯誼會是 1990 年代tī北美洲chhui-sak台語文ê核心組織。主要ê成員有鄭良偉、鄭良光、陳雷、陳柏壽、李勤岸、蘇正玄、張秀滿kap葉國基等。

Ùi第 6 屆 2000 年開始，主辦地點以台灣為主，kan-taⁿ 2012 年是以台越訪問團ê形式去越南訪問交流。第 6 屆由高雄kap台南市政府等單位掛名主辦，實際由台南市文化基金會、高雄台語羅馬字研習會、李江却台語文教基金會、台南市菅芒花台語文學會承辦。第 7 屆 2001 年由李江却台語文教基金（hit時主要chhōa-thâu--ê有陳明仁、陳豐惠kap廖瑞銘）會等單位tī淡水真理大學舉辦。營隊上尾工sīn-sòa辦台羅會成立大會 3。台羅會成立liáu，ùi 第 8 屆 2002 年開始接辦， 每年（有 2 冬例外）lóng tī hioh-lo̍a h辦世界台語文化營。Chit-ê營隊sui-bóng 一開始是以大人學員做對象，後來有時mā有siâng-sî兼辦囡仔營。

屆	年月日	營隊名稱 主題	主辦單位 理事長/秘書長	營會地點
1	1995/7/13 ~ 17	北美洲台語文夏令會 嘴講台灣話，手寫台語文	台灣獨立建國聯盟 Houston支部	美國Houston
2	1996/8/1 ~ 4	北美洲台語文夏令會 促成正規化ê台灣語文教育	衛鄉台灣基督教會 台灣佛教萬佛會 台灣獨立建國聯盟美國本部	美國 Los Angeles
3	1997/8/25 ~ 30	世界台灣語文營 無主題	開創台灣文化基金會 台文通訊社 榮後文化基金會等	台南縣南鯤鯓
4	1998/10/31 ~ 11/1	Ùi chit 屆開始名稱定形： 世界台語文化營	聰美基金會 台文通訊聯誼會等	Honolulu, Hawaii
5	1999/7/30 ~ 8/1	主權國家ê台灣文學	聰美基金會 台文通訊聯誼會等	Honolulu, Hawaii
6	2000/3/10 ~ 12	無主題	高雄市政府 台南市政府 民視電視公司等 (由台南市文化基金會 高雄台語羅馬字研習會 李江却台語文教基金會 台南市菅芒花台語文學會承辦)	高雄公務人力中心
7	2001/8/17 ~ 19	新世紀ê台語文化觀	李江却台語文教基金會等	淡水真理大學
8	2002/7/11 ~ 13	台語文學kap母語教學	台灣羅馬字協會 張復聚/洪嘉品	高雄公務人力中心
	2003 因為SARS ê 關係停辦		林清祥/王寶漣
9	2004/7/14 ~ 16	發展性ê台灣母語教育kap文化政策	台灣羅馬字協會 林清祥/王寶漣	台中東海大學
10	2005/8/12 ~ 14	台灣話銷全球 -- 全球化下台灣語言文化ê國際佈局	台灣羅馬字協會 蔣為文/吳仁瑟	台南勞工中心
11	2006/7/7 ~ 9	語言kap 生態多樣性	台灣羅馬字協會 蔣為文/吳仁瑟	綠島公館飯店
12	2007/7/6 ~ 8	台灣教育ài母語化	台灣羅馬字協會 何信翰/張淑真	淡水真理大學
13	2008/7/4 ~ 6	台語‧生活‧台灣	台灣羅馬字協會 何信翰/張淑真	鹿港天后宮
	2009因故停辦		台灣羅馬字協會 廖瑞銘/丁鳳珍
14	2010/7/9 ~ 11	台語、資訊、戲劇夢	台灣羅馬字協會 廖瑞銘/丁鳳珍	國立台中教育大學
15	2011/7/8 ~ 10	台語‧社區‧文化	台灣羅馬字協會 何信翰/曹芬敏	中山醫學大學
16	2012/7/5 ~ 9	越南脫漢經驗	kap台越文化協會 台文筆會合辦 何信翰/曹芬敏	越南河內
17	2013/7/26 ~ 28	搶救台灣文化資產	台灣羅馬字協會 李文正/陳金花	台南億載國小
18	2014/8/9 ~ 10	台灣人的定位	台灣羅馬字協會 李文正/陳金花	台南烏山頭

表1. 世界台語文化營歷年主題、負責人kap地點

第 2 類成果方面，主要分做 2 小部分。第 1 是台語輸入法 ê 開發 kap chhui-sak。上早是 1990 年代鄭良偉研發 ê TW-301，蘇芝明 ê HOTSYS。後來有劉杰岳 ê Taiwanese Package，kap 現此時上普遍使用 ê「信望愛台語客語輸入法」。信望愛輸入法主要是林俊育、陳柏中 kap 信望愛資訊中心等合作研發。第 2 部分是數位化 kap 網路傳播。主要 ê 成果 kap 計畫主持人列 tī 表 2。

連結	計畫主持人
台語客語現代文學網站	蔣為文
台語文數位典藏資料庫 (台灣文學館 1)	呂興昌、楊允言
白話字數位典藏博物館 (台灣文學館 2)	廖瑞銘
台灣白話字文獻館	李勤岸
台語文記憶	楊允言
台語信望愛綜合網站	林俊育&台語信望愛
信望愛台語聖經查詢	林俊育
甘字典查詢	林俊育&中研院&台語信望愛
台語辭典(台日大辭典台語譯本)查詢	林俊育&中研院&台語信望愛
台文/華文線頂詞典	楊允言

表2. 白話字 kap 台語文資料數位化 & 網路傳播 ê 主要成果

台羅會辦 ê 研習課程大概有 kúi 種：羅馬字研習班、台語認證加強班、台語文學寫作班、台語種子師資班等。政治遊說 kap 抗爭有時是台羅會 ka-tī 進行， 有時聯合友社做伙出力，大概 ê 項目列 tī 表 3。

年閣	主題	主要 chhōa-thâu ê 會員
2005~2008	參與杜正勝主導下教育部國語會 ê 台語拼音整合、 台羅拼音方案制定 kap 教育台灣化相關議題。 註：當時整合 ê 先決條件是台羅拼音是 beh 解決國校台語教材羅馬字用法無一致 ê 困擾 niâ， 並無進一步取代 iah-sī 禁止傳統白話字 tī 社會上使用 ê 按算。	施正鋒、李勤岸、蔣為文
2009/2/27	發動群眾去立法院抗議洪秀柱刪除台語認證預算。	蔣為文、廖瑞銘、李文正、何信翰
2009/7/29	發動台語正名群眾抗議發動！我是台灣人，不是閩南人！ 本土社團聯合送蛇到教育部，反對閩南語歧視稱呼，抗議教育部歧視台灣人。	蔣為文、李文正、陳明仁、丁鳳珍
2011/5/23	Kap陳亭妃立委國會辦公室合辦記者會， 抗議教育部以教材審查名義逼台語出版社樣閩南語名稱。	蔣為文、陳明仁、張淑真、林清祥、蔣日盈
2011/5/24	Tī台灣文學館提海報抗議黃春明對台灣語文工作者ê侮辱。 事後引發媒體界kap台文界ê文學語言大論戰。	蔣為文、穆伊莉
2011/6/13	要求教育部還我台灣語文教育權 kā教育部吳清基部長遞交抗議書	蔣為文、李文正、陳明仁、陳豐惠

表3. 台羅會主要ê 政治遊說 kap 抗爭

台灣 ê 羅馬字運動tī 20 世紀 ê 發展 sui-bóng 有比越南khah 慢，m̄-koh tī 21 世紀初台羅會成立liáu chit-ê 差距已經 lú 來 lú chió。文字改革beh 成功，通常是tī 社會大變動ê 時chiah 有機會。台灣現此時mā tú-hó 是危機變轉機ê khám-chām。咱ba̍k-chiu 若peh hō͘ 金，lia̍h tio̍h 機會，羅馬字kap 台語文beh 變正式ê 台灣官方文字是真有可能ê！

※ 本文原載 2014 《台江台語文學》季刊 11 期。

參考冊目：

• 李勤岸 2006〈北美地區台語文之研究、教學及推廣〉《母語教育政策及拼音規劃》。台南：開朗雜誌事業有限公司。
• 蔣為文 2009〈蔡培火 kap 台灣文化協會 ê 羅馬字運動之研究〉，《台灣風物》期刊，59 （2），41-65 頁。
• 蔣為文 2011 《民族、母語與音素文字》台南：成功大學。
• 蔣為文 2013〈教會內台語白話字使用人口 kap 現況調查〉，《台語研究》期刊，5(1)，74-97 頁。